ՀԱՆԴԻՊՈՒՄՆԵՐ ԱՐՏԱՎԱԶ/Դ/ՈՒՄ

ԵՎ ԲԱԼԱՀՈՎԻՏՈՒՄ

1

Հունվարի 3-ի հանդիպման ժամանակ որոշվեց հաջորդ օրն ակումբի անդամ Գայանե Ղազարյանի հրավերով այցելել Կոտայքի մարզի Արտավազ/դ/ գյուղ: Այս այցը վաղուց էր պլանավորված, ամիսներ առաջ, բայց տարբեր պատճառներով անընդհատ հետաձգվել էր:
Ու պարզվեց, որ այս անգամ էլ այցը կարող էր հետաձգվել: Նախորդ օրը հայրը մի փոքր վիրավորվել էր ու ...
Հունվարի 4-ի առավոտյան ակումբի մի քանի անդամների ասացի, որ դժվար կարողանանք գնալ: Մյուսները եկան և կրկին կապվեցինք Գայանեի հետ:
Եվ գնացինք:
Արտավազ/դ/ գյուղը մեզ ընդունեց մի քիչ ձյունոտ, բայց արևառատ եղանակով: Մեզ հյուրընկալաբար ընդունեցին Գայանե Ղազարյանի հայրը՝ շինարար Գուրգենը, կինը՝ նախկին դասվար Նելլին, քույրերը՝ Մանկավարժականի շրջանավարտ, սոցմանկավարժ Գոհարը և գյուղի միջնակարգ դպրոցի 7-րդ դասարանցի Աննան: Այստեղ էին նաև տատիկն ու պապիկը՝ ճարտարագետ, գյուղապետի նախկին տեղակալ Վրեժը, մանկապարտեզի նախկին խոհարար Լենան, նրանց որդին՝ քեռի Կարենը, քեռակին Մարիետան, նրանց երեք որդիները:
Մի կատարյալ հայկական հյուրասիրություն կազմակերպվեց:
Կենացներ ասվեցին Նոր տարվա առթիվ: Բոլոր կենացների հիմքը հայոց բանակն էր ու մեր խաղաղությունն ապահովող հայ զինվորը, յուրաքանչյուր կենաց ուղեկցվում էր հայրենասիրական երգով ու Հայաստանին, հայ հերոսներին ձոնված բանաստեղծություններով, խրոխտ, հայրենասիրական պարերով, որոնք կատարում էին «Չորեքշաբթի» գրական ակումբի անդամներ Հրաչյան /Ժորա Հակոբյան/, Վահե Խալաֆյանը, Մարիամ Գևորգյանը, Արմենուհի Մելքոնյանը, Անի Հովսեփյանը, Միխայիլ Շահինյանը, Հրաչյա Պետրոսյանցը:
Արտավազ/դ/ը պատմական բնակավայր է, անգամ կապվում է Աշխարհացույցից հայտնի Արտավազդական ապարանքի հետ, որ ամենայն հավանականությամբ կառուցվել է Արտավազդ արքայից արքայի օրոք՝ հին ժամանակների 1-ին դարում՝ նրա պատվերով: Այս գյուղը հարևան Փյունիկ գյուղի հետ միավորված է մեկ համայնքի մեջ: Ունի միջնակարգ դպրոց, մանկապարտեզ: Դպրոցի 12-րդ ավարտական դասարանում սովորում է 11 աշակերտ: Իսկ ընդհանրապես ներկայում գյուղից 6 ուսանող է սովորում Մանկավարժական համալսարանում:
Գյուղապետի նախկին տեղակալ Վրեժի հետ պայմանավորվածություն ձեռք բերվեց պարբերաբար հանդիպել գյուղի բնակիչների հետ, ներկայացնել դասախոսություններ պատմության թեմաներով ու դրանք ուղեկցել երաժշտական կատարումներով:
Միայն ուշ երեկոյան տանտերերն ու հյուրերը բաժանվեցին իրար կրկին հանդիպելու պատրաստակամությամբ:

2

Վերադարձին Աբովյան քաղաքի մոտ խումբը կրկին կանգառ արեց այս անգամ Բալահովիտում՝ «Չորեքշաբթի» գրական ակումբի հիմնադիր անդամ Հրաչյայի /Ժորա Հակոբյան/ հայրենի օջախում:
Մայր Աթոռ Սուրբ Էջմիածնի Գևորգյան ճեմարան ընդունվելուց հետո նա առաջին անգամ էր ակումբակիցների հետ հանդիպել ու հայրենի օջախում հյուրընկալեց ու հյուրասիրեց ակումբակիցներին:
Օջախի հայրը՝ Մամբրեն, աշխատանքի էր ու չորեքշաբթեցիներին ընդունեցին տատիկը՝ Թամարան և մայրիկը՝ Նարինեն:
Այստեղ ևս ասվեցին կենացներ, հնչեցին բարեմաղթանքներ, կարդացվեցին բանաստեղծություններ, կատարվեցին հայրենասիրական երգեր:

Օրը հագեցած էր հայրենասիրությամբ, ստեղծագործությամբ և երկար կմնա արշավին մասնակից «Չորեքշաբթի» գրական ակումբի անդամների հիշողության մեջ: