ԹԵԿՆԱԾՈՒՆԵՐԸ ԴՈՒՐՍ ԵՆ ԳԱԼԻՍ ԸՆՏՐԱՊԱՅՔԱՐԻՑ

Մարտի 27-ին «Դաշինք» կուսակցության քաղաքական խորհուրդը որոշում ընդունեց հետ կանչել կուսակցության նախագահ Սամվել Բաբայանի թեկնածությունը, որը մեծամասնական ընտրակարգով առաջադրվել էր թիվ 37 ընտրատարածքում: Միաժամանակ հայտարարվեց, որ «Դաշինքն» աջակցելու է նույն ընտրատարածքում առաջադրված Սամվել Հարությունյանին (Բաբայանը կառաջադրվի համամասնական ընտրակարգով` «Դաշինքի» կուսակցական ցուցակով, որտեղ նա առաջինն է):

Հարությունյանն առաջադրվել է նաև նախկին արտգործնախարար Րաֆֆի Հովհաննիսյանի գլխավորած «Ժառանգություն» կուսակցության ցուցակով: Թիվ 37 ընտրատարածքում նրա հիմնական մրցակիցն է նորանշանակ վարչապետ Սերժ Սարգսյանի եղբայրը` ԱԺ պատգամավոր Ալեքսանդր Սարգսյանը: Վերջերս լուրեր էին տարածվել, թե Սամվել Բաբայանի վարորդը, իսկ հետո նաև ինքը` Բաբայանը, կալանվել են: Հայ վերլուծաբանները կապում են այս բավական հակասական իրավիճակն այն հանգամանքի հետ, որ Բաբայանը պետք է խորհրդարանական տեղի համար պայքարեր վարչապետի եղբոր դեմ:

Դեռ ավելին, արդեն ապրիլի 2-ին մի շարք փոփոխություններ արվեցին «Դաշինք» կուսակցության համամասնական ցուցակում: Մասնավորապես, ցուցակից հանվեցին հետևյալ թեկնածուները. համար 16 (Արա Եղիազարյան), 20 (Վարդան Թովմասյան), 26 (Տիգրան Պետրոսյանց), 27 (Վիկտոր Հակոբյան), 32 (Արիս Հակոբյան), 35 (Գարեգին Ղազարյան), 42 (Լիլիթ Պետրոսյան) և 47 (Էդուարդ Սարիբեկյան): Բացի այդ, հանվել է նաև կուսակցության քաղխորհրդի անդամ Անդրանիկ Թևանյանի թեկնածությունը, որը կուսակցական ցուցակում 8-րդն էր: ԿԸՀ մամուլի քարտուղար Ծովինար Խաչատրյանը հայտնել է, որ վերոհիշյալ անձինք գրանցման համար անհրաժեշտ փաստաթղթերը չեն ներկայացրել: Կուսակցության ներկայացուցիչները հրաժարվել են մեկնաբանել ցուցակից Թևանյանի թեկնածությունը հանելու փաստը:

http://www.armenianow.com/node/7202