,,...ԱՆՀՐԱԺԵՇՏ Է ՄՇՏԱՊԵՍ
ԻՆՔՆԱԿՐԹՈՒԹՅԱՄԲ ԿԱՏԱՐԵԼԱԳՈՐԾՎԵԼ...,,
20.07.2011 թ.
Հունիսի
20-ին Խաչատուր Աբովյանի անվան հայկական պետական մանկավարժական
համալսարանի օտար լեզվի ֆակուլտետի հեռակա բաժնի 70-ից ավելի
շրջանավարտների հանձնվեցին բակալավրի ավարտական դիպլոմներ:
Շնորհավորելով շրջանավարտներին, ֆակուլտետի դեկան Կարեն Հայրյանը նշեց. ,,մեր
օրերում գիտությունն այքան է զարգացել, որ լինի առկա, թե հեռակա
ուսուցում, միևնույնն է` չորս կամ հինգ տարվա ուսուցման ժամանակահատվածում
հնարավոր չէ կատարելապես տիրապետել լեզվի հիմունքներին: Անհրաժեշտ է
մշտապես ինքնակրթությամբ կատարելագործվել...,,:
Շրջանավարտներին ողջունեցին և կյանքում հաջողակ լինելու մաղթանքի խոսք
ասացին քննական հանձնաժողովի նախագահ, Երևանի պետական համալսարանի
թարգմանության ամբիոնի դասախոս, բանասիրական գիտությունների թեկնածու,
դոցենտ Սեդա Գաբրիելյանը, Խաչատուր Աբովյանի անվան մանկավարժական
համալսարանի օտար լեզուների մասնագիտական ուսուցման ամբիոնի վարիչ,
գիտության թեկնածու, դոցենտ Դոնարա Ղազարյանը:
Շրջանավարտներին ողջերթի խոսք ասաց համալսարանի գիտական գրադարանի տնօրեն Տիգրան Պետրոսյանցը: Նա նշեց. ,,...
մեզ բոլորիս դաստիարակողը մանկավարժն է և ամենամեծ պատիվը, որ աշխարհում
կարելի է տալ մանկավարժինն է, որովհետև նա է, որ պատրաստելու է այն բոլոր
մարդկանց, ովքեր այսօրվա և վաղվա Հայաստանի, մեր մտածողության տերն են
լինելու: Ես մանկավարժի ընտանիքում եմ ծնվել: Իմ մայրը հիսուն տարի առաջին
դասարանի աշակերտների է ա-ից մինչև օ սովորեցրել, և ինձ` նույնպես: Եվ
մանկավարժի նկատմամբ իմ անանց սերը գալիս է այդտեղից: Որպես օտար լեզվի
ուսուցիչներ դուք ունեք շատ կարևոր խնդիր: Մարդ արարածը պիտի տիրապետի
լեզուների: Մեր պատմահայր Մովսես Խորենացին խոսել է մի քանի լեզուներով: Եվ
նա առաջին հայ պատմիչն էր, որ 5-րդ դարում շարադրել է հայոց պատմությունը
օգտագործելով իր ժամանակի հայտնի լեզուներով հայերի մասին ստեղծված
գրականությունը: Մենք պետք է տարբեր ազգերի հետ շփվենք և պետք է շփվենք
իրենց լեզուներով: Եվ կարևոր է, որ դուք օտար լեզու ուսուցանողներից պետք է
լինեք: Մեզ և լավ ուսուցանողներ, և լավ թարգմանիչներ են պետք: Ես
շնորհավորում եմ ձեզ դիպլոմ ստանալու կապակցությամբ: Շնորհավորում եմ նաև
ձեր դասախոսներին ֆակուլտետի դեկան Կարեն Հայրյանի գլխավորությամբ, որ
հերթական շրջանավարտներին են ճանապարհում կյանք,,:
Տիգրան Պետրոսյանցը Նարինե Ամիրխանյանին, Անի Մուրադյանին /երկուսն էլ կարմիր դիպլոմակիրներ/, Ադրինա Պողոսյանին, Գոհար Աղաջանյանին, Իննա Աֆրիկյանին դիպլոմների հետ հանձնեց իր ,,1000 հայազգի գեներալներ, ծովակալներ,,, իսկ Կարինե Իվանյանին և Գևորգ Հորքանյանին` իր ,,200 հայ զորավարներ,, գրքերը:
http//mankavarzh.do.am
