Սեպտեմբերի
28-ին ՀՊՄՀ գիտական գրադարանի հումանիտար գրականության ընթերցասրահի փոքր
սրահում տեղի ունեցավ գիտական գրադարանի ՛՛Չորեքշաբթի՛՛ գրական ստուդիայի
հերթական հանդիպումը: Ստուդիայի հիմնադիր Տիգրան ՊետրոսՅանցը
ներկայացրեց ստուդիայի ամենակրտսեր անդամ, Եվրասիական համալսարանի 11-րդ
դասարանի աշակերտուհի Նանա Մկրտչյանի ՛՛Երազանք՛՛ արձակ
ստեղծագործությունը, դրվատական խոսք ասաց ստեղծագործության մասին և այն
հանձնեց ստուդիայի անդամներին ընթերցելու համար: Իրենց նոր
ստեղծագործությունները ներկայացրեցին ՀՊՄՀ ուսանողներ Արփի Մկրտչյանը,
Լիլիթ Ավագյանը, ՀՊՄՀ 2013 թ-ի գերազանցիկ շրջանավարտ Սերինե
Հովհաննիսյանը, գիտական գրադարանի տնօրեն Տիգրան ՊետրոսՅանցը: Երիտասարդ
ստեղծագործողներին ողջունեցին բանաստեղծներ Հովհաննես Շանթը, Աշոտ
Միրզոյանը: Նրանք գովեստի խոսք ասացին ստեղծագործող ուսանողներին և
ընթերցեցին իրենց գործերից:
Ստուդիայի ամբողջ ընթացքը նկարահանվեց ՛՛Երկիր մեդիա՛՛ հեռուստաընկերության կողմից:
Օրերս
Խաչատուր Աբովյանի անվան հայկական պետական մանկավարժական համալսարանի
գիտական գրադարանի հյուրն էր անվանի մտավորական, բանասեր Պարգև Շահբազյանը:
Նա կատարեց նվիրատվողի պարտականություն և գրադարանին հանձնեց կանադահայ
մտավորական Յակոբ Ալթունեանի 2012 թ-ին Տորոնտո քաղաքում հրատարակված ՛՛Հայ
մշակոյթի լուսաւոր ուղիներէն՛՛ բարձրարժեք աշխատության մեկ օրինակ
հեղինակի նվիրագրով. ՛՛Խաչատուր Աբովեանի անուան մանկավարժական համալսարանի գրադարանին հեղինակին կողմէ: Թորոնթօ, 2012՛՛:
Յակոբ Ալթունեանը ծնվել է Լիբանանի Բեյրութ քաղաքում: նախնական և
միջնակարգ կրթություն ստացել է Բեյրութի հայկական վարժարաններում, ապա
ավարտել է Բեյրութի Ամերիկյան համալսարանի տնտեսագիտության բաժինը: Եղել է
Ապրո Ապրոյեան և Ընկերություն ճարտարարուեստական հաստատության աշխատակից,
իսկ 1960-1998 թվականներին՝ տնօրեն: 1988-1993 թվականներին Բեյրութի
Ֆրանսիական համալսարանի հրավերով դասավանդել է ճարտարարվեստի բաժնում:
Գործուն մասնակցություն է ունեցել Բեյրութի հայկական կյանքին: Դասավանդել է
Լիբանանի Հայաստանեայց եկեղեցու կիրակնօրյա վարժարաններում, 1960-1968
թվականներին եղել է Բեյրութի Թեքեյան վարժարանի հոգաբարձուների խորհրդի
ատենապետ, 1968-1993 թվականներին եղել է Հայկական բարեգործական ընդհանուր
միության Լիբանանի շրջանային հանձնաժողովի անդամ, վերջին հինգ տարիներին՝
հանձնաժողովի ատենապետ: 1998 թվականին հաստատվել է Կանադայի Տորոնտո
քաղաքում: Գիտական գրադարանի տնօրեն Տիգրան ՊետրոսՅանցը սիրով ընդունեց
Պարգև Շահբազյանի կողմից փոխանցվող նվեր-գիրքը և շնորհակալություն հայտնեց
նրան՝ Յակոբ Ալթունեանի նվերը փոխանցելու համար:
